ന്യൂഡല്ഹി: കശ്മീര് ജനതയോട് സ്നേഹത്തിന്റെ ഭാഷയിലാണ് പെരുമാറേണ്ടതെന്ന് ഗാന്ധി പീസ് ഫൗണ്ടേഷന് ഉപാധ്യക്ഷന് പി.വി. രാജഗോപാല് ആവശ്യപ്പെട്ടു. കശ്മീര് പ്രശ്ന പരിഹാരത്തിനായി കേന്ദ്രസര്ക്കാര് ഗാന്ധിയന്മാരുടെ സഹായം തേടാത്തത് നിര്ഭാഗ്യകരമാണെന്നും അദ്ദേഹം പറഞ്ഞു. ചമ്പല്ക്കാടുകളിലെ കൊള്ളശല്യം അവസാനിപ്പിക്കാനും മറ്റും കേന്ദ്രസര്ക്കാര് നേരത്തേ ഗാന്ധിയന്മാരെ സമീപിച്ചിരുന്നു. എന്നാല് കഴിഞ്ഞ 15 വര്ഷമായി ഗാന്ധിയന്മാരെ ആരെയും കേന്ദ്രസര്ക്കാര് സമാധാനശ്രമങ്ങളില് സഹകരിപ്പിക്കുന്നില്ല.
അടുത്തിടെ കശ്മീര് സന്ദര്ശിച്ച സാമൂഹിക പ്രവര്ത്തകരുടെ പ്രതിനിധി സംഘത്തില് രാജഗോപാല് പങ്കാളിയായിരുന്നു. കോവ എന്ന സന്നദ്ധ സംഘടനയുടെ നേതൃത്വത്തിലാണ് ഓരോ ഘട്ടമായി സാമൂഹിക നേതാക്കളെ കശ്മീരിലെത്തിച്ച് ജനസമ്പര്ക്ക പരിപാടികള് സംഘടിപ്പിക്കുന്നത്. ഗീലാനി, യാസിന് മാലിക്ക് തുടങ്ങിയവരെയെല്ലാം തങ്ങള് കണ്ടു സംസാരിച്ചെന്ന് രാജഗോപാല് 'മാതൃഭൂമി'യോടു പറഞ്ഞു. സമാധാനമാണ് തങ്ങള് ആഗ്രഹിക്കുന്നതെന്ന് യാസിന് മാലിക്ക് കൂടിക്കാഴ്ചയില് അഭിപ്രായപ്പെട്ടു. കശ്മീരിലെ ഭൂരിഭാഗം ജനങ്ങളുടെയും ആഗ്രഹം ഇതാണ്. ഒരു ചെറിയ വിഭാഗം മാത്രമാണ് സംഘര്ഷങ്ങള്ക്കു പിന്നില്. എന്നാല് കശ്മീര് ജനതയെ ഒന്നാകെ സംശയദൃഷ്ടിയോടെ കാണുന്ന സമീപനമാണ് സര്ക്കാറിന്റേതും സേനയുടേതുമെന്നും രാജഗോപാല് പറഞ്ഞു.
കശ്മീര് ജനതയുടെ ഹൃദയം നേടിയെടുക്കാന് സര്ക്കാര് ഒന്നും ചെയ്തില്ല. സ്നേഹത്തിന്റെയും സാഹോദര്യത്തിന്റെയും ഭാഷയിലാണ് അവരോടു സംസാരിക്കേണ്ടത്. വിമര്ശിക്കുന്നവരെ അടിച്ചമര്ത്തുന്ന സമീപനം മാറ്റണമെന്നും രാജഗോപാല് ആവശ്യപ്പെട്ടു. ഇന്ത്യയിലെ പല സംസ്ഥാനങ്ങളിലും കശ്മീരിലെ ജനങ്ങളെ കൊണ്ടുപോയി സംസാരിപ്പിക്കുന്നതടക്കമുള്ള പരിപാടികള് തങ്ങള് സംഘടിപ്പിക്കുമെന്നും അദ്ദേഹം അറിയിച്ചു. മറ്റു സംസ്ഥാനക്കാര്ക്ക് കശ്മീര് ജനതയെക്കുറിച്ചുള്ള തെറ്റിദ്ധാരണ മാറാനും കശ്മീരുകാര്ക്ക് ഇന്ത്യയെ മുഴുവന് അറിയാനും ഇത്തരം സംവാദങ്ങള് സഹായിക്കുമെന്ന് രാജഗോപാല് അഭിപ്രായപ്പെട്ടു. സ്വാമി അഗ്നിവേശ്, സാമൂഹിക പ്രവര്ത്തക മോഹിനിഗിരി തുടങ്ങിയ ഒട്ടേറെ നേതാക്കള് ഇതിനകം കശ്മീര് സന്ദര്ശിച്ചിരുന്നു. ഡല്ഹിയില് നടന്ന കശ്മീര് ഐക്യദാര്ഢ്യ സമ്മേളനത്തില് അദ്ദേഹം സംസാരിച്ചു.
No comments:
Post a Comment